O Peque Coro e a Música pola Paz



O 30 de xaneiro de 2011 chegou a maxia ao Xan Viaño. Celebrábase a primeira edición de Música pola Paz, e nela tiña lugar a presentación pública do Peque Coro.

No seu estreo, apenas 20 nenos e nenas, con Catuxa Pita Evia, pianista e directora do Peque Coro, encheron de ilusión o escenario do noso auditorio. Pouco despois, incorporouse como pianista Alexandra Pita, formando xunto con Catuxa, o equipo perfecto para levar adiante o marabilloso proxecto do Peque Coro, cunha ilusión que non parou de medrar en ningún momento ata que a pandemia chegou.

Foron pasando os anos, dez para ser exactos, e o Peque Coro nunca faltou aos concertos de Música pola Paz, celebrando o 30 de xaneiro do 2020 o X Música pola Paz e o décimo aniversario do Peque Coro.

Cada 30 de xaneiro o Peque Coro tiña un dos seus concertos máis especiais de todo ano.  Concertos se cabe máis especiais, ao estrear obras de amigos e compañeiros como Begoña Álvarez, Lucinio Medel e Alma Cendán. 

Chegou o Día da Paz e encóllesenos o corazón a todos, sabendo que este ano non puido ser, mais haberá máis música pola paz e máis peque coro, abofé que si!

Grazas Catuxa e Alexandra, pola vosa inmensa ilusión e dedicación, grazas á cal, nenos e adolescentes deciden voluntariamente ir cantar os venres pola tarde despois de toda unha  intensa semana de traballo. Esa capacidade de motivación, só é posible cando as cousas se fan de corazón. A vosa ilusión a reciben os pequenos en cada ensaio, e o público e as familias emocionadas, en cada actuación. É todo un privilexio e un orgullo para o conservatorio, contar cun proxecto da grandeza do Peque Coro, no que valores como o respecto, a integración, a solidariedade, a amizade, o traballo en equipo… acadan metas que van moito máis aló da dimensión musical.  

Rematamos recordando unha frase dunha canción interpretada polo peque coro nun deses concertos,  A Ronda do Soldadiño:

Os meninos lindos não nascem para fazer mal!



Comentarios

Publicacións populares deste blog

As mulleres pisan forte - Música Mestra! 25N

Concerto de Nadal 2021 adicado aos nosos queridos maiores

III Parladoiro do Xan Viaño