En todas as claves

  Por fin este Nadal puidemos retomar os nosos concertos solidarios nas residencias de maiores de Ferrol, concretamente nos centros DomusVi, Mi Casa e a residencia de Caranza. Sentímonos moi emocionados ao poder volver a compartir a nosa música cos nosos maiores de forma presencial e desexarlles un bo Nadal e  un feliz 2023. Nos recitais participou alumnado de piano, violín, trombón e frauta e resultou coma todos os anos unha experiencia moi enriquecedora para todos, maiores e pequenos, que vai moito máis aló do musical. Dende convivencia queremos dar as grazas a todo o alumnado participante e tamén a Iria profe de violín, Joe profe de trombón e aos profes de piano Miguel, Alexandra e Alma, por animar aos seus alumnos e alumnas a unirse a esta iniciativa tan fermosa nas residencias de Ferrol onde todos os anos nos tratan con tanto cariño. Deixámosvos algunhas fotos como pequena mostra de todo o vivido nestes recitais. Bo Nadal e feliz ano novo! 

Onte pola tarde tivemos a grandísima sorte de celebrar un ano máis o noso parladoiro.   Grazas a Dani, Nera, Ali, Jorge e Rita que compartiron con todos nós as súas experiencias e os seus consellos para axudar ás futuras xeracións  do Xan Viaño. Sempre é un motivo de ledicia  que os antigos alumnos e alumnas volvan á súa casa, o Xan Viaño, e nesta ocasión énchenos de orgullo que sigan colaborando co profesorado e alumnado deste centro. Emociónanos escoitarvos e tomamos nota de todos os consellos! Parabéns a todos e todas e felices festas!

  D ende o vindeiro luns 12 e ata o mércores 21 levaremos a cabo no conservatorio a campaña solidaria Música que alimenta na que  recolleremos  alimentos para a Cociña Económica de Ferrol. Precísase todo tipo de alimentos non perecedoiros, pero de xeito especial leite, aceite, augas e zumes individuais, café soluble, azucre, conservas de vexetais, froitas en almibre... que poderedes depositar no espazo que habilitaremos na entrada do conservatorio. Nestas datas temos grandes concertos solidarios a cargo das nosas agrupacións (Peque Banda o luns 12, Banda de 1º e 2º. de grao profesional o xoves 15, Orquestra o venres 16 e Coro de Grao Profesional e Peque Coro in crescendo o mércores 21) polo que esperamos unha gran acollida desta iniciativa solidaria no Xan Viaño! Agardamos a colaboración de toda a comunidade educativa! G razas a todos e todas pola vosa colaboración!

Temos o orgullo de convidarvos un ano máis ao noso Parladoiro, unha xornada de reencontro cos nosos antigos alumnos e alumnas para charlar, compartir experiencias e dar consellos sobre os estudos superiores de música ao noso alumnado. A cita será o  vindeiro mércores 21 de decembro ás 16:00 h no noso auditorio. No vídeo presentación que achegamos, tedes a información dos participantes desta cuarta edición. Animádevos a participar!